مشترياتي iherb الشخصية

أهلا وسهلا

مثل ماوعدتكم ..

راح انزل صور مشترياتي واعلمكم التكاليف ..

اولا انا الشحن كلفني لكامل الشحنة  اللي طلبتها قبل كم يوم هو 43.69 $

وطبعا اضرب المبلغ بقيمة الدولار في بطاقتي  المستخدمة ( بطاقة الانماء ) وهو 3.79 ريال

43.69 × 3.79 = 157 ريال ( جبرت النص )

المهم بعضكم يقول ليه كثير هالمبلغ .. وانا ماشوفه كثيير ابدا

اولا مشترياتي كان وزنها 9.40 lbs باوند يعني حول 5 كيلو

ثانيا كانت 14 غرض 



اقسمي مبلغ الشحن كامل (157 ريال) على عدد الاغراض (14) = 12 ريال تقريبا

 لكل منتج طلبته زيادة على سعره الأصلي ..


كيذا نعرف التكلفة طبعا تختلف عندي وعندك اذا طلبتي على حسب وزن مشترياتك 

والمبلغ النهائي وعدد الاغراض ..


طولت كلام .. يلا نشوف الأغراض 


صورة جماعية :

واضح كيف كل شي مغلف لحال وعليه بلاستك يحميه واللي ماعليه انا شلته ترى

نروح للتفاصيل ؟! يلا
          

::1::

فرشاة الجسم .. بالشعر الطبيعي .. تزيل الجلد الميت والسلوليت .. فوائدها متعدده

وأفضل الموجود هنا وطبيعي هي فرشة بودي شوب وتباع بسعر 69 ريال

سعرها بالموقع = 27 ريال

انا كلفتني مع الشحن = 39 ريال 

الفرشاة رائعة ومقبضها طويل .. وشعرها اهم شي خشن طبيعي 100% تنفع للصنفرة السويديه ( ابحثي عنها )

::2::

سيروم للشعر .. يعطي لمعة ونعومة .. ويسيطر على النفشة وهي اهم شي.. ويحمي من حرارة الاستشوار

مكوناته طبيعية ونباتية 100% خالي من المواد الضارة

سعره = 21 ريال

المنتج المشابه له هنا سيروم كريستال بسعر 25 ريال .. لكن ابدا مايقارن فيه لا بالنتيجة ولا المكونات

::3::

غسول للوجه ومجدد .. بفايتمين سي

مكوناته طبيعية ونباتية 100% خالي من المواد الضارة

70% مواد عضوية

سعره = 32 ريال

المنتج المشابه له هنا غسول فايتمين سي من بودي شوب بسعر 99 ريال ..

::4::

مزيل للعرق برائحة الرمان .. يزيل رائحة العرق لمدة 24 ساعة فقط .. ولايمنع التعرق .. ومكوناته طبيعية 100% وخالي من المواد الضارة

سعره = 26 ريال

المنتج المشابه له هنا مزيل عرق بيزلين بسعر 40 ريال ..

::5::

بنفس الصورة زيت الجسم بايو اويل .. ومعروف بفوائدة المتعددة

سعره = 68 ريال

المنتج نفسه يباع هنا بصيدليات بوتس بسعر 105 ريال ..

::6::

صابونة جوز الهند والبابايا .. رائحتها تأخذك لعالم ثاني ..

تشد البشرة وتعمل على تفتيحها 

طبيعية 100%

سعرها = 12 ريال

المنتج المشابه له هنا صوابين Lush  طبيعية واسعارها مرتفعه تبدأ من 30 ريال حسب الوزن ..

::7::

معجون اسنان طبيعي يحمي اللثة ويفتح الاسنان بشكل طبيعي ايضا

سعره = 17 ريال

معاجين الاسنان المنتشرة ملئية بالفلورايد وتزيد حساسية الاسنان منتجات تجارية ..

::8::

شامبو وغسول جسم بالرمان .. طبيعي ويحتوي على 7 زيوت 

سعره = 20 ريال

::9::

اخر منتج غريب .. 

سكر عضوي .. طبيعي ومو مكرر مثل السكر الابيض عندنا

طبعا هو للاكل.. لكن انا ماشتريته لهالغرض

اشتريته كـ سكراب للجسم .. رااااائع ويعطي نعومة ويزيل الجلد الميت والسواد

شريته بناء على بلوقر اجنيبه تستخدمه لبشرتها .. ومشاءالله بشرتها خيال..

سعره = 21 ريال

فيه منه حجم اكبر اغلى وحجم اصغر ارخص

انا اخذت الوسط ويعتبر كثييير

المنتج المشابه له ملح الحليب يوكو .. تعرفونه؟ بـ 5 ريال .. بس طبعا صيني ومكوناته مش طبيعيه كلها

روابط المنتجات + كود خصم اضافي 

الخصم راح يضاف تلقائيا للسلة ولو ماحصلتيه هذا هو اضيفيه MQB406

1-

فرشاة الجسم

2-

سيروم الشعر

3-

غسول الوجه

4-

مزيل العرق

5-

بايو اويل

6-

صابونة جوز الهند والبابايا

7-

معجون الاسنان

8-

غسول الجسم   - شامبو الشعر

9-

السكر العضوي

هنا منتج مجاني لاتفوتونه .. وهو مرطب للشفايف طبيعي ورائحة زيت الزيتون تفوح منه + بالاضافة لرائحة الفاكهه اللي تختارينها هنا

اتمنى أعجبتكم المشتريات وكانت مفيدة ..

القاكم بالمشاركة الجاية بإذن الله وحـ تكون عن موقع ومنتجات كوستال 

تجربة بالصور للشراء من موقع iherb

صباح الخير،،

بعد ماتعرفنا على موقع iherb

الآن حابين نطلب ،،

تعالو نشوف الصور

بعد ما نختار المنتجات اللي حابين طلبها 

1) نروح أعلى الصفحة لعرض سلة التسوق

 نشيك على المشتريات وننزل تحت نشوف تكلفة الشحن والوزن

الوزن عند كل قطعة موضح 
والـ lb هذي اختصار للباوند اللي يحسب بنص كيلو
وتقدرين تشيلين وتضيفين وتشوفين الوزن وقيمة الشحن قدامك 
نضيف الكوبون MQB406  للخصم

2) نختار دولة السعودية

3) نعمل تشيك اوت

4) نبدأ ندخل بيانات الشحن ونضغط NEXT

5) نعبي بيانات البطاقة ونضغط NEXT

بعدها خلاص بيسوي لك ريفيو للطلب تأكدي من طلباتك وتممي العملية :)
وبيجيك ايميل تأكيد الطلب - بعدها ايميل اذا تم الشحن + رقم التتبع وماراح يتشغل الا بعد 24 ساعة

راح تاخذ 5 الى 6 ايام عمل ..

اول ماتوصل راح يتواصلون معك ups  عشان تستلمينها او توصيل لباب بيتك :)

انتظروني بالبوست الجاي .. راح احط صور مشترياتي من هالموقع وتقييمي لها :)

موفقين ..

حابه تبدين تشترين .....

مرحبا ,,

كيف الحال جميعا . . وان شاءالله مستمتعين بالعطلة ..

بعد ما انتهينا من البطاقة وطلعناها .. وماننسى التفعيل !

الأن نقدر نسوي عملية شراء من الانترنت 

معقولة؟! الموضوع بالسهولة هذي بس؟

ايه تقدرين صح فيه مواقع تسوي اشتراطات .. بس ليش ادخلك بالمعمه هذي ..

خلونا نبدأ نطلب من المواقع اللي ماتحتاج تعقيدات واشتراك الخ

وبتشوفون الموضوع كيف سهل .. بعدها ننتقل للمواقع الثانية وكل ماوجهتنا مشكلة طرحنا حلها

احسن من اني اسرد الحلول وتتلخبطون ..

انا احب وأفضل الدروس العملية هي اللي تفيد الشخص

تتفقون معي ؟!

يله نروح لموقع جميل ومفيد ومضمون 100%

هنا رابط الموقع

 :: معلومات عن الموقع ::

الدولة : امريكا

العملة: دولار

ماذا يبيع الموقع:  متجر يبيع منتجات من شركات مختلفة، منتجات غذائية - فيتامينات واغذية تكميلية - منتجات عضويه - منتجات تجميلية الخ..

نوع الشحن : دايركت للسعودية ولباب بيتك .. وماتحتاجين لأي اشتراك في بريد او غيره.

الناقل : UPS

قيمة الشحن : تعتبر اقتصادية مقارنة بالوقت والوزن .. فالموقع يقوم بحساب ميزان لطلباتك .. فأول كيلوين (4 باوند) قيمتها 24$ وكل نصف كيلو بعدها يزيد المبلغ 2$ ..

مدة الشحن :  6 ايام عمل تقريبا ( باستثناء الاجازات والاعياد )

 :: وش ممكن اشتري من الموقع ! ::

فرش ريل تكنيك الرائعة .. وتنشحن مباشرة لباب بيتك .. حابة تعرفي تكلفتها مع الشحن

لو اخذتي :

الطقم الأساسي + طقم العيون + فرشاة البلشر + فرشاة الفاونديشن المشطوفة + فرشاة الستبيلنق = 317 ريال  وتوصلك حتى باب بيتك

وعارفه كم تنباع الطقم الأساسي لحاله بس بصيدلية وايتس بالرياض = 250 ريال :(

زيت بايو أويل الغني عن التعريف .. (حتى تبان النتيجة لازم الاستخدام مايقل عن 3 شهور من تجربه ) 

يعطيك نعومة + ويزيل الخطوط البيضاء + ويزيل الندبات ويحسن من مظهر البشره .. وفوائده كثير ..

حابه تعرفين كم قيمته مع الشحنه فوق وبنفس قيمة الشحن بدون زيادة = 68 ريال 

ويباع بصيدلية بوتس بالرياض بـ 105 :(

ايش رأيك الان تستكشفين الموقع وتشوفين ايش محتاجة .. والرابط مزود بكود خصم 10$ لمشترياتك 

الأن اعطيتكم نبذه بسيطة عن الموقع .. البوست الجاي راح يكون شرح عملي للشراء من الموقع مع طريقة كتابة العنوان + الدفع + واستخدام كوبون الخصم

شكرا لكم ،،

البطاقات الائتمانية

مرحبا من جديد ..

بعد ما انتهي من الأساسيات الي محتاجينها للشراء من الإنترنت .. راح أبدأ بعرض التجارب والإقتراحات .. 


الخطوة الأولى للشراء من الإنترنت :

بطاقة ائتمانية credit card

والأفضل في مجال الشراء من الانترنت والأكثر أمان هي البطاقات المسبقة الدفع ( يعني مافيها فلوس متى ما احتجتيها تشحنينها بالمبلغ المطلوب فقط)

ولها انواع :
 Visa فيزا
Master card ماستر كارد


مافي بينهم اي فروقات واضحة تقريبا الأغلب مقبول بكل المواقع .. بس مهم تعرفين لما تملكين البطاقة وش نوعها.

وش الاشياء المطلوبة منك؟ ومن أي بنك تطلعينها؟

1- تحتاجين فتح حساب بالبنك اللي اخترتيه (ماعدا بنك الأهلي مايشترط )
2- صندوق بريد (عادي مو بأسمك وشكلي ماراح يستخدمونه)
3- اثبات (هوية وطنيه)
4- يطلعونها لك حتى لو ماعندك راتب شهري وبدون اشتراط مبلغ معين بالحساب ولغير الموظفات ايضا

البنوك :

1- بطاقة مسبقة الدفع بنك الراجحي :

عندهم بطاقتين : بطاقة تسوق الائتمانية - بطاقة إنسان الائتمانية
رسوم سنوية : 100 ريال
سعر الدولار بالبطاقة = 3.80 ريال
نوعها : Visa فيزا كريدت كارد
اصدار فوري
عيوبها : كثرة التحديث بالبنك مماتتعطل عمليات الدفع والتحويل + الرسوم السنوية 


2- بطاقة مسبقة الدفع البنك الأهلي :

رسوم سنوية : 100 ريال
سعر الدولار بالبطاقة = 3.86 ريال  (اول ماتتم العملية يحسب الدولار= 3.75 - بعد ماتنزل بكشف الحساب يحتسب الدولار  3.86 ريال بسبب العمولة )
نوعها : Master card ماستر كارد كريدت كارد
عيوبها :  الرسوم السنوية + سعر الدولار المرتفع جدا



3- بنك الانماء ديبيت كارد

بطاقة صراف + فيزا بنفس الوقت
لاتوجد رسوم سنوية : مجانية
نوعها : Visa فيزا ديبيت كارد
سعر الدولار بالبطاقة = 3.79 ريال ( اول ماتتم العملية يحتسب بـ  3.86 ريال لما ينزل بكشف الحساب يرجع الفرق ويحتسب الدولار 3.79 )

عيوبها : العمليات ماتظهر بكشف الحساب على طول تتأخر كم يوم

جبت لكم اشهر البطاقات .. لأي استفسار عن أي بطاقة اخرى .. او تفاصيل اكثر للبطاقات اللي ذكرت لاتتردين بترك تعليقك هنا وراح ارد 

شكرا ..

اذا اعجبكم البوست .. كملت بإذن الله الخطوات الي بعدها للشراء

مرحبا..

كل عام وانتم بخير .. وعيد سعيد للجميع ..

سعيدة بقربي هنا منكم .. 
لا لإجابات استفساراتكم فقط .. بل بعرض طرق مختلفة للشراء .. ومنتجات مميزة .. والتسوق بذكاء من مواقع الانترنت المختلفة.

سأشارككم تجاربي .. وامور مميزة بإذن الله.

لمن تبحث عن كيفية الشراء - الأسعار - والجودة, فستجد ما يسرها في هذه المدونة.

شكرا للمتابعة,